Arde Lucus 2021

Coa etiqueta #AvivandoAChama, a edición número vinte do Arde Lvcvs volve á modalidade presencial adaptándose ás restricións sanitarias da Covid19 (control de cabida, máscaras de protección, circuítos de entrada e saída, cálculo de visitantes para evitar aglomeracións) e avanzando cara a internacionalización da festa. 

A programación deste ano combina o formato presencial e seguro, con pequenas actividades nas redes sociais. Entre as principais novas, figura a realización de varios concertos, a celebración dun Armilustrium como acto final de recollida das armas, e a elaboración do graffiti “Caio Julio César” na Rolda da Muralla, obra que acadou transcendencia mundial converténdose, a través da votación popular impulsada desde as redes sociais, no mellor graffiti do mundo realizado en 2021. 

Como iniciativa para acadar a distinción de Festa de Interese Turístico Internacional, a finais deste ano, baixo a tutela do concelleiro Mauricio Repetto, visitaron Lugo periodistas representantes de medios de comunicación de dez países e tres continentes, cuxos reportaxes deron a volta ao mundo.