O Arde Lvcvs Cvltvral xa está en marcha para conmemorar por todo o alto o 25 aniversario da gran festa de recreación histórica de Lugo. O concelleiro de Urbanismo, Deportes e Xuventude, Jorge Bustos, presentou unha programación que inclúe case 20 actividades deseñadas para poñer a historia, o patrimonio, o deporte, o ocio e o turismo ao servizo desta efeméride. Este programa paralelo aos actos propios da festa, que terá lugar do 18 ao 21 de xuño, destaca pola estreita colaboración de colexios, clubs deportivos, asociacións e o Servizo Municipal de Arqueoloxía.

A programación arrancou con forza no mes de abril coa celebración da Asamblea Nacional da Asociación Española de Festas e Recreacións Históricas e diversos obradoiros de EcoPercusión nos centros de ensino da cidade. Durante o mes de maio, o deporte cobra protagonismo coa implicación de clubs como o CD Lugo e o CB Breogán, quen presentará unha camisola conmemorativa deste 25 aniversario. Ademais, os veciños e visitantes poderán gozar de exposicións como a maqueta de Lvcvs Avgvsti a escala ou a emblemática “conta atrás” na Mosqueira o vindeiro 30 de maio.

Historia, patrimonio e deporte

O patrimonio e a cultura terán o seu espazo destacado en xuño coa celebración do VIII Congreso Internacional da Sociedade de Estudos da Cerámica Antiga en Hispania (SECAH) e visitas guiadas polo patrimonio asociado á festa. Como broche final a este ciclo cultural, o 19 de xuño a Praza da Soidade acollerá unha gran actuación de EcoPercusión, pechando así un camiño de actividades que nos conducen directamente ao corazón do “Annvs Argentevs”